Ostiralean abiatu zen Uharte-Arakiletik Altsasuraino hiru egunez ibilaldia eta eztabaida, mendia eta hausnarketa, uztartu dituen Nafarroako Gazte Martxa. Nafarroako eskualde ezberdinetatik gerturatutako 60 gazte inguruk Uharteko plazan egin zuten topo ostiral goizean. Aralarreko maldetan gora bota zituzten lehenbiziko izerdi tantak, San Migel baselizaraino igo arte. Hango aterpetxean bazkaldu, eta euskararen egoeraren inguruko eztabaidari ekin zioten inguruetako larre batean. Egun euskaldunok bigarren mailako herritarrak garela abiapuntutzat hartuta, egoera iraultzeko hausnarketa burutu zuten, euskara erabiltzeko konpromiso pertsonal eta kolektibotik abiatuta. 

Uharte-Arakiletik abiatuta, gaur hasi eta igandera arte luzatuko den Nafarroako Gazte Martxaren lehenbiziko etapa osatu dute 50 bat gaztek, Arbizura iristeko. Eskualde ezberdinetatik iritsita, Uharte-Arakileko plazan elkartu dira goizeko 11:00tan gazteak, eta harrera ekitalditxo baten ostean, Aralarko San Migel baselizarainoko bideari ekin diote, aldapan gora. Bi ordutara iritsi ez den ibilbide baten ostean ailegatu dira helmugara gazteak. Bertan, bazkari goxoaz gozatu eta euskararen egoera aztertzeko eztabaida burutu dute, gerizpean. Era horretan, egun euskaldunok Euskal Herrian bigarren mailako herritarrak garela eta euskaraz erabat bizitzeko aukera guztiak ukatzen zaizkigula presente hartuta, egoera hori iraultzeko hausnarketan murgildu dira. Norberak plano pertsonalean zein kolektiboan euskara erabiltzeko egin beharreko haututik abiatuta euskararen normalizaziorako beste hainbat ildotan sakondu beharra adierazi dute.